كنت في عباس العقاد وفيه عجوز بيبيع ذره قدام النساجون الشرقيون
وكنت واقف جنب منه علشان الحرارة بتاعت الدرة كانت مدفية المنطقه :)

المهم جت مدام ومعاها بناتها الأتنين
قالتله بكام كوز الذره
رد العجوز وقال الواحد باتنين جنيه

راحت المدام قالتله هات تلاته
وبعد ماعملها تلاته راحت المدام ادتله اربعه جنيه
فالعجوز قاللها مينفعش ده الواحد بأتنين
قالتله لا هو كده كويس
فالعجوز قاللها طيب خليهم خمسه

قالتله لا هو كده كويس
وخدتهم ومشيت
وبالرغم من كده العجوز قالتله الف هنا وشفا

كل ده كوم
ولما ركبت عربيتها هي وبناتها وادت السايس خمسة جنيه كانت صدمة بجد

يعني واحد في ليلة راس السنة بيشوي ذرة علشان يروح بعشوه حلوه لعياله بنفاصل معاه
وواحد معلش في الكلمة لا المكان مكانه ولا استهلك حاجه من جيبه
يدوب بيقولك ارجع لورا واطلع لقدام ياخد خمسة جنيه

الجنيه اللي هندفعه ده مش هيفقرنا .. لكن ممكن يغني ناس زي كده
مش يغنيهم ماديا بس هيغنيهم عن سؤال اللئيم زي مابيقولوا ..

كل سنة وانتوا طيبين